دوقتوره مین‌لر آلقیش
نه یای تانی‌یار، نه قیش
معاینه‌سی بودور:
اوْن خسته‌یه بیر یاخیش!
***
خسته‌نین دردین بیلر
مهربانلیق‌لا گولر
دئسه‌ن‌کی: «باشیم آغریر»
آپاندیست عمل ائلر!
***
دوقتور بَیگه ماشاء‌ا…
اوْنو قوْروسون ا…
اوزدن ایراق، اوْ «جن»دیر
دفترچه‌ده بسم‌ا…!
***
مطبی ائدیب دایر
ناخوْش‌لاری اوْخشاییر
بیر ال‌ده نبضی توتوب
بیری ایله‌ده پول ساییر!
***
بیمه‌ای‌لری قوْوار
گؤرجک، سالار های– هاوار
بئله داوالار یازیر
تک ناصرخسرودا وار!
***
دوقتورلر اوْلمور تنبل
هم گؤز چالیشیر، هم ال
گون‌ده یوز ویزیتی وار
بئش– آلتی مورد عمل!
***
گل دوقتور کنارینا
بیر باخ کسب– کارینا
تکجه مطلبی ده‌گر
یوز زرگر بازارینا