|

آخرین عناوین:
  • تاریخ انتشار خبر :پنج شنبه ۱۶ فروردین ۱۳۹۷ - ۱۲:۱۴ | کد خبر : 68946
  • پرینت

    یادداشت ترکی: جهانبخش احمدیان

    طنز: اَل ایاق سیز مسئول‌لار و ۲۰۱۸ آچیلیشی

    آذرقلم: باخین مسئول‌لار گؤزلرین آچیب یومانا قدر، ۴ آی ۲۰۱۸ نجی ایلدن کئچدی. هله ده وار بیزیم مسئول‌لار آدام آختاریرلار کی بوینوموزا حاق قویسون و گلیب بو فرهنگی اولایی افتتاح ائله سین. دولتین رئیسین گؤزله‌ییرلر کی گئدیب گزیب دولاناندان سونرا، واقتی اولسا، بئکارچیلیغا چیخسا، گلسین بو ۲۰۱۸ قیرمیز روبانینا بیر قیچی وورسون کی بو فرهنگی اولای باشلانسین. قورخوموز وار تام پلان‌لار، فستیوال‌لار ایجرا‌سیز قالا، یانی واقت اولمیا و بو بئله زحمت یئرسیز اولا.

    یادداشت شهری: جهانبخش احمدیان
    آذرقلم: هر زامان ایسته‌دیک مسئول‌لارین ال ایاق سیزلیغیندان یازاق، بو آقای سردبیر بیر قیچی آلدی الینه و یازیلاریمیزی قیچی‌له‌دی کی تهلوکه‌لی‌دیر، رحمین گلسین منه، اهل عیالیم وار و بئلنچی سؤزلر ایله بیزی کور پئشمان ائدیب، اوتورددو یئریمیزده.
    البته ال ایاق‌سیز دئمک بو دئیل کی آللاه ائله‌مه‌میش عزیز مسئول‌لارین الی یا ایاغی یوخدور، یوخ، ماشاءالله گؤزوم قره داشا ال قولو اوزوندولار. دوزدور کی بو اوزون ال ایاق، اوزون دیل‌لرینه چاتماز، آمما اوجور دا دئیل کی وور تپه‌لریندن چؤرک‌لرین آل.
    هن دییردیم، نه قدر یازیرسان کی ال سیز، ایاق سیز مسئول‌لاریمیز وار، ایش باجارمیرلار، فورصت یاندیریرلار و… سردبیر قیچی‌سینه توش گلیر. بیزه ‌ده یالنیز حیرص یئمک قالیر.
    باخین مسئول‌لار گؤزلرین آچیب یومانا قدر، ۴ آی ۲۰۱۸ نجی ایلدن کئچدی. هله ده وار بیزیم مسئول‌لار آدام آختاریرلار کی بوینوموزا حاق قویسون و گلیب بو فرهنگی اولایی افتتاح ائله سین. دولتین رئیسین گؤزله‌ییرلر کی گئدیب گزیب دولاناندان سونرا، واقتی اولسا، بئکارچیلیغا چیخسا، گلسین بو ۲۰۱۸ قیرمیز روبانینا بیر قیچی وورسون کی بو فرهنگی اولای باشلانسین. قورخوموز وار تام پلان‌لار، فستیوال‌لار ایجرا‌سیز قالا، یانی واقت اولمیا و بو بئله زحمت یئرسیز اولا.
    اصلا باخین گؤروم، رئیس دولت بو نئچه گونو هارالاردا سئیر ائدیر؟ بایرامین ۷ نجی گونونه قدر تئهران دا اوتوروب و بایرام گؤروشلرینه گئدیردی. وزیر، وکیل گؤرورب، اوپوش گؤروش ائدیردی. البته دییرلر کی ایسحاق جهانگیری یه یئتیشنده بوروق وئریب‌دی کی بایرام قاباغی تلفات وئرمه‌سین لر. ۷ گوندن سونرا، اهل عیالین الیندن یاپیشیب و آذربایجان اؤلکه‌سینه طرف یولا دوشوب و اوردان دا آللاه بیلیر هارا گئده‌جک کی تبریز ۲۰۱۸ دن واجیب دی. سؤز ایندی بوردادیر کی بو ۷ گونده، ایکی ساعات واقت ائله‌مه‌ییب کی تبریزه گلیب و بو ۲۰۱۸ آچیلیشین اعلام ائله سین؟ بلکه‌ده تبریزه گؤره یازی‌سی یوخدور، یا یازمیب‌لار بیله‌سینه، اودا ائله اؤنملی دئیل. او قاباق کی پرزیدنت نه‌دیر، ماحمود، ایکی کلمه سؤز اؤیرنمیشدی هر زامان تبریزه گلیردی اونو اوخوردو : حیدر‌بابا، دُنیا یالان دُنیادی … قورتولدو گئتدی.
    هن بونو عرض ائدیردیم کی نیه مسئول‌لاریمیز بئله ال ایاق‌سیز‌دیلار؟! طرف معاون اول رئیس جمهور، اؤز ایاغی‌نان دوروب گلیب تبریزه، یانی چاغری‌سیز، دعوت‌سیز تبریزی سئچیب دولانماغا، نئجه اونو توتوب بیر قیرمیز روبانی کسدیره بیلمه دیلر؟ ائله ایسحاق کی کندوانا گئتمیشدی گز‌مه‌گه، پیشیم پیشیم ایله، بیر ایکی قورو بوش افتتاح ائله‌مه‌لی طرح آدی ایله، چکردیز تبریزه طرف و نئچه دوربین، قازئتچی ایله اوز به اوز ائدیب قیچی وئره‌یدیز الینه کی قارداش کس بو روبانی، بیزی حسنین منتینه قویما!


    هله بیر سوال دا منیم بئینیمه چاتدی کی گؤره‌سن کندوانلی‌لار ایسحاق‌دان یئر پولو آلدیلار اوردا یا دولت آدامی اولدوغونا گؤره مایا قویوب و پول‌سوز یولا سالدیلار؟! بیز بیر دفعه ائله تزه بیر ۴ مئتیرلیک قورو یئر تاپمیشدیق کی پالاسیمیزی آچاق، ایکی‌سی قوندو باشیمیز اوستونه کی، خوش گلیبسیز، قابیلی یوخدور ۳۰ مین ائلر. یانی بیر ۴ مئتیر قورو یئرین ایجاره‌سی او ماحال دا، ۳۰ مین دیر. توریستی بیر گلیردی او جاماعاتا، آلله برکت وئرسین و کندوانی اونلارین الیندن آلماسین.
    بیر ریوایت ده وار کی بو تبریز ۲۰۱۸ اولایی‌نین آچیلیشین ساخلاییبلار کی خاریش‌دن گلن قوناقلاریمیز، تام برابر شکیلده بوتون شهرلر آراسیندا پای بؤلوش اولسونلار کی باشقا شهرلرین حاققی توریسم گلیریندن تبریزلی‌لر جیبینه گئتمه‌سین. بودا حاق سؤزدور و جاوابی یوخدور.نئجه او یاشیل قاطاری ایصفهان، یزد، شیراز دان اؤنجه تبریزه چئویریردیلر کی آوروپالی‌لار تبریزی‌ده گؤرسونلر، ایندی ده همن سیاست‌دیر کی بایرام توریست‌لری ده ائله بوتون شهرلری گزسین‌لر. مشمول‌ ذّمه‌سیز فیکیر ائده‌سیز بس تبریز حاضیر دئیل و بونا گؤره پای بولوش اولوب‌دور کی آبیریمیز گئتمه‌سین.
    هئچ زاد دا، بوش بوشونا بیر مسئولی الدن وئردیک، تورا سالانمادیق کی گلیب ایشمیزی یونگول ائدیب و بیر آی قاباغا آتا بیله میزی. دییرلر اودا گیزلی گلمیشدی ایاق اوسته بیر کندوانی گؤره، آرواد اوشاغی بیر کندوان سویوندان ایچه، خبرلرده واری‌دیر کی برک خئیری وار و داش سالان دیر. سس‌سیز، سالام‌سیز گلیب گئده‌جادی کی اوزونون فیزیولوژی‌سی تانیددیریب‌دی کی بابا بو همن ایسحاق دی. حسن روحانی‌یه باغیشلانمیشدی کی اونون جورون چکسین. بیلمیرم نیه تبریزه یئتیشنده، ایشلری سالیر حسنین اؤز باشینا کی گئت اؤزون آچیلیش روبانی نی قیچی‌له، یامان یاووز دا دئسه‌لر، ائله اؤزوو توتسون.
    ایسحاق دا اوچدو الیمیزدن، گل ایندی حسنین میننتین چک، بویونا اوخشا کی بیزیم تبریز ۲۰۱۸ اولایی نی افتتاح ائله دا نولار؟!

  • برچسب ها : , , ,
  • نظرات کاربران در "طنز: اَل ایاق سیز مسئول‌لار و ۲۰۱۸ آچیلیشی"
    Seo wordpress plugin by www.seowizard.org.