|

آخرین عناوین:
  • تاریخ انتشار خبر :سه شنبه ۲۲ اسفند ۱۳۹۶ - ۰۹:۵۵ | کد خبر : 56787
  • پرینت

    آذرقلم: بیزیم چرشنبه ده نه چین واریدی نه تاراقا، نه ال ایاق یاناردی، نه گؤز چیخاردی،
    اوت واریدی، شنلیک واریدی، دییب گولمه ک، اویناماق، اوخوماق، یومورتا بویاماق، چاققیشدیرماق، پول آلماق و… بونلاریم بیزیم سون چرشنبه ده اولان، قایدالاریمیزیدیر کی تأسفله چوخلاری اونودولوب و یئرینی چینی تاراقالار آلیب کی سس لریندن چوخ تهلوکه لری وار

    یادداشت روز: جهانبخش احمدیان

    آذرقلم: نئچه گوندور کی شهرین هر طرفینده تاقا تاق سسی گلیر. بو سس بو آیدا یالنیز بیر آنلامی وار و اودا بودور کی : ایلین سون چرشنبه سی گلیپ چاتدی. اوشاقلار بو گونو شنلیک ایله کئچیرمک اوچون، اؤز بؤیوک لریندن چوخ هوسلی دیلر. چرشنبه آخشامینی گؤزله ییرلر کی عائله لری ایله بیرلیکده بیر تونقال قالاییب و اوتون اوستوندن آتیلسینلار. آتا بابادان قالان دب و قایدالاری دیریلدیب و قوشقولار و شئعرلر اوخوسون لار.

    آما نئچه ایلدیر کی چرشنبه قایدالاریندان یالنیز تاراقا آتیب سس سالماغی و اوت یاندیرماغی  یئرینه یئتیریرلر، یا بعضا اوتودا یاندیرمیرلار و تکجه تاراقا ایله چرشنبه گئجه سی نی عزیز توتورلار. بو کی نه اولدو قایدالاریمیز، دب لریمیز اونودولوب و یئرین چینی تاراقا، ال بمباسی و… آلدی، چوخلو بحث یئری وار. هئچ ایسته میریک بو قونویا گیریب و بوندان بحث ائدک. ایستکیمیز تکجه قایدالاریمیزدان نئچه سینی ساییب و اونلارین گؤزللیک لرینی گؤسترمک دیر.

    گؤزوموزو آچاندان، بیزده اوشاقلیق عالمینده بو گونو گؤزلردوک. ایلین سون چرشنبه سینی کی هاواق گلیب چاتاجاق، و بو گونو نئجه کئچیره جه ییک. قاری ننم  چوخ هوس ایله دوروب قوورغا قووراردی و  آخشاما چاغ بو قورغانی جیبیمیزه دولدورب و اؤزوموزه دوموک ائله ردیک. آخشام دا بو قورغادان بیر بشقابا ییغیب وچرشنبه سوفره سینه دؤشردی.

    photo_2017-03-14_08-21-17

    سوتلو آش پیشیرردی که یانیندا بیر کاسا دوشاب قویوب و چوخ گؤزل بزک وئرردی

    هدیک پیشیرردی کی اونودا سوغان داغ ایله بزه ییب سوفره یه قویاردی

    نئچه یومورتا گؤتوروب و الینده اولان ایپلر ایله او یومورتالاری گؤزل گلینجک لره اوخشادیب و سوفره یه قویاردی . بو یومورتالاردان نئچه سینی ده سوغان قابیغی ایله بویاق وئرردی.

    بیز اوشاق ایکن، یومورتالاردان گؤتوروب و آرالیقدا چاققیشدیریب و سینان لارینی بیر قازانج کیمین ییب یا ائوه گتیرردیک.

    بیزیم مراسیم آخشام گون باتاندان سونرا باشلاردی. قاش قارالدیقجا بیزیم هیجانیمیز داها چوخ اولاردی. اوت قالاماق واقتی دیر. تونقال ییغیب، نفتی سپیب و اوت آچاردیق. دفعه لرجه اوتون اوستوندن آتیلاردیق، و هر کیم چوخلو هَلو و اوت اوستوندن آتیلسایدی، اونون قورخمازلیغی اؤز یولداشلارینا ثبوت اولاردی. بیزده ائله آتیلدیقجا آتا بابادان قالان قوشقولاری اوخویاردیق

    آتیل ماتیل چرشنبه

    بختیم آچیل چرشنبه

    بیر ایکی ساعات اوتونان اوینیان دان سونرا، ائوه قاییدیب و چرشنبه سوفره سی نین باشیندا اولاردیق. گؤزل یئمک لر، میوه لر، چرشنبه یئمیشی، کی گؤزل لیک له بیر سوفره یه یئرله شیبلر، بیزی داها ماراقلی ائله ردی. قاری ننه خئیر دوعاسی وئرردی بیله میزه، ناغیل لار، قوشقولار اوخویاردی، بیزده قولاغیمیز قاری ننه ده و گؤزلریمیز سوفره ده اولان یئمک لرده اولاردی.

    سونرا پای آپارماق واقتی دیر. بی بی لریمیزه، باجی لاریمیزا سوفره دن اولان یئمک لردن پای آییریب و بایرام لیق لاری ایله بیر لیکده بیر بوقچایا باغلاییب و یولا دوشه ردیک. آتامیز ایله گئدیب و بایراملیق آپاران یولداشی اولاردیق. بوندان علاوه اوشاق اولدوغوموزا گؤره پول، پالتار و… آلاردیق.  بو پول لار بایراملیق دئیلدی، آنجاق بایراملیق آپاران اوشاقلارا وئرردیلر و هر ایل بو پول لارین اوستونده حساب گئدیب و یولداشلاریمیز ایله بو باره ده دانیشاردیق کی نئچه پول ییغیبسان؟

    بیزیم چرشنبه ده نه چین واریدی نه تاراقا، نه ال ایاق یاناردی، نه گؤز چیخاردی،

    اوت واریدی، شنلیک واریدی، دییب گولمه ک، اویناماق، اوخوماق، یومورتا بویاماق، چاققیشدیرماق، پول آلماق و… بونلار بیزیم سون چرشنبه ده اولان، قایدالاریمیزیدیر کی تأسفله  چوخلاری اونودولوب و یئرینی چینی تاراقّالار آلیب کی سس لریندن چوخ تهلوکه لری وار.

    آمما کندلرده دب لریمیز نئجه یدی؟

    اوجور کی ائشیتمیشیک گومان اوردا شنلیک بوردان داها چوخی دیر.

    داملارین اوستونده اوت قالاییب و قیزلار و اوغلانلار اوت اوستوندن آتیلیب و اوخویاردیلار :

    آتیل ماتیل  چرشنبه،

    بختیم آچیل چرشنبه،

    سویون باشی بیزیمدیر،

    چاخماق داشی سیزین دیر

    قوورغا، هدیک، سوت آشی پیشیریب و اوت مراسیمیندن سونرا یئمه که باشلاردیلار. کند ده اولان چوخ گؤزل قایدالارین بیری سی شال ساللاماق دیر. یانی اوشاقلار و جاوانلار گئدیب باجالاردان شال ساللاییب و بایراملیق لارینی طلب ائله ردیلر. ایده، خورما، کیشمش، یا پول. چوخلاری کی شال لارین ساللاییب و ایده کشمش آلاردیلار، اونو بوشالدیب یئنی دن ساللاردیلار کی هئچ اولماسا بیر قیران باغلایین. ائوده شالا بایراملیق باغلیان، ایده یا پولو باغلیاندان سونرا اوجا سس ایله دییه ردی کی : “چک آللاه اورک مطلبیوی وئرسین”.

    چرشنبه آخشامی ائوین بؤیوکو هاممی یا تاپشیراردی کی بو گون یاخجی سؤزلر دانیشین، و آغیزیزی خئیر ایشلره آچین، بلکه دام دالی سیندا، باجا اوستونده بیری سی وار و ائشیدیر. بودا بیر اینانجی دیر کی گئدیب باجالاردان گیزلینجه قولاق آسیب و هر نه ائشیتسه، اونون گله ن ایل یاشام یازی سی اولاجاق.

    چرشنبه گونونده سحر تئزدن بولاغ باشیندا یئر اولمازدی، قیز گلین، قاری هاممی بولاغ باشینا گئدیب چرشنبه سویو ایله ال اوز یوماغ ایستردیلر. و او سودان ائوه گتیریب و ائوین دؤرد گوشه سینه سپردیلر. ائوین خانیم لاری بیر آووج بوغدا گؤتوروب و داما سپردیلر، گئجه دن قالمیش شیرنی لردن داما سپردیلر و گینه ده اوشاقلار بو شیرنی لری ییغیب و یئمه که باشلاردیلار. چرشنبه سویوندان پالچیق دوزلدیب و ائوده اولان کول لارا پالچیق ووروب و ناققیش چکردیلر.

    یا بیر آووج اوون گؤتوروب و دووارلارا، و کول لارا ناققیش ووراردیلار.

    بو قایدالارین هاممی سی نین آنلامی واردیر. گلن ایل اوچون برکت و شیرین لیک آرزو ائدیرلر.

    بونلار بیزیم قدیمدن قالمیش چرشنبه دب لریمیز و قایدالاریمیزدیر. بیر قایدالار کی تأسفله یاددان چیخیب و تکجه خاطیره لری قالیر بیزیمله. بلکه ده بو قایدالارین اونوتولماسی و یئرینی تاراقا و قورخو آلماق، مدرنیته نین نیشان لاریندان دیر.

     

  • برچسب ها : ,
  • نظرات کاربران در "بیزیم چرشنبه میز نه چینی دیر، نه تاراقّاسی وار!"
    Seo wordpress plugin by www.seowizard.org.